1. Прескокни до содржината
  2. Прескокни до главната навигација
  3. Кон други страници на DW

Обама одлучно на страната на Јапонија

ЖА/дв/дпа/ртре24 април 2014

Американскиот претседател Барак Обама при посетата на Јапонија го истакна значењето на партнерството на двете земји за регионот. Тоа претставува база за сигурноста во азиско-пацифичкиот простор, изјави Обама во Токио.

https://p.dw.com/p/1BnsH
Фотографија: Reuters

Американскиот претседател Барак Обама на средба со јапонскиот премиер Шинзо Абе во Токио ја изрази посветеноста на Вашингтон на одбрана на Јапонија, вклучително и островите кои се во центарот на територијалниот спор со Кина. Обама, сепак, ги отфрли гласините дека повлекува нова црвена линија и повика на мирен дијалог за островите.

„Не заземаме позиција за конечно одредување на суверенитетот на островите Сенкаку, но историски тие биле под управа на Јапонија и сметаме дека не треба да бидат предмет на унилатерална промена.“

Но, Обама истакна-сојузот со Јапонија го покрива и прашањето за островите, значи, ако островската група биде нападната, САД ќе интервенираат. Тоа не е нова позиција, туку доследна, истакна Обама на заедничка прес конференција по средбата со Абе.

Островската ненаселена група која Кина ја нарекува Диаоју се наоѓа во морски води богати со риби, а во близина се претпоставуваат и големи резерви со нафта и гас. Кина постојано испраќа бродови и чамци околу островите, со цел да демонстрира сила.

Обама истакна дека во рамките на својата азиска турнеја особено ќе ја потенцира одговорноста на сите земји за почитување на меѓународното право и основните правила во светот. Американскиот претседател од Токио заминува за Сеул, Куала Лумпур и на крај во посета на Манила.