د امریکا او چین د لوړپوړو پوځي چارواکو خبرې
۱۴۰۲ دی ۱, جمعه
د امریکا متحده ایالاتو د مشترکو ځواکونو لوی درستیز کیو براون او د چین د خلق آزادي بخښونکي پوځ مشر جنرال لیو ژنلي ترمنځ د پنجشنبې ورځې ویډیویې کنفرانس تر یوه کال په ډیره موده کې دا د دواړو لورو ترمنځ لومړنۍ خبرې اترې وې.
د ۲۰۲۲م کال په اګست کې تایوان تهد امریکا د سنا مجلس مشرې نانسي پلوسي له سفر وروسته بیجنګ دا ډول د لوړې کچې ملاقاتونه ځنډولي ول. خو تیره میاشت د امریکا د ولسمشر جو بایډن او د هغه د چینایي سیال شي جنګ پنګ ترمنځ له موافقې وروسته بالاخره دواړه هیوادونه د مذاکراتو په بیا پیلولو راضي شول.
له دغو خبرو اترو څخه د دواړو هیوادونو د پوځونو ترمنځ د پراخو اړیکو د عادي کیدو تمه کیږي.
دواړو پوځي مشرانو پر کومو موضوعاتو خبرې کړي دي؟
د براون له دفتر څخه په خپاره شوي اعلامیه کې ویل شوي دي چې د جنرال چارلس کیو براون او د چین د ولسي آزادي بخښونکي پوځ (پي ایل ای) مشر جنرال لیو ژینلي په ویډیویي کنفرانس کې د سیمه ایز او نړیوال امنیت په اړه پر ډېرو مسائلو خبرې اترې شوي دي.
لیو د مرکزي پوځي کمیټې مشر هم دی چې د چین د جنګي عملیاتو او پلان جوړونې مسئولیت هم لري. د امریکایي پوځ یوه ویاند جیریل دروسي ویلي دي چې «جنرال براون د سوتفاهم د امکاناتو کمولو له پاره په مشخصو خبرو اترو کې د چین د ولسي آزادي بخښونکي پوځ مشر د موجودیت پر اهمیت ټينګار وکړ.»
بروان تیره میاشت ویلي ول چې هغه تیره میاشت جنرال لیو ته یو لیک استولی دی چې ورته یې پکې ویلي دي هغه د ملاقات له پاره اماده دی.
د چین د پوځ مشر څه ویلي دي؟
د چین د دفاع وزارت له خوا د پنجشنبې په ورځ ناوخته خپرې شوې یوې اعلامیې پر اساس لیو ویلي دي چې د امریکا او چین ترمنځ سالم، مستحکم او پایداره اړیکو ته د پراختیا ورکولو کيلي «د چین په هکله د امریکا په سم درک کې» نغښتې ده.
لیو د خبرو اترو پر مهال د امریکا له خوا د چین سیمه ایزې خپلواکۍ ته او د چین په سویلي سمندر کې د پراخو سمندري حقونو او ګټو ته په درناوي کولو ټینګار وکړ.
چین تایوان خپله سیمه بولي. بیجینګ وایي چې د خپل دې هدف ترلاسه کولو له پاره له زوره هم استفاده کولی شي.
مثبت پرمختګ
د پنټاګون ویاند پیت راییدر د براون او لیو ترمنځ د پنجشنبې ورځې خبرې اترې «مثبت پرمختګ» وباله او ويې ویل چې د جو بایډن او شي جن پنګ له خوا د اعلان کړو پروژو د عملي کولو له پاره کار کوي.
رائیدر وویل: «کله چې تاسې سره دوه لوی پوځونه وي، نو دا اړینه ده چې موږ د غلط فهمیو د مخنیوي له پاره د خبرو اترو سرچینې خلاصې پریږدو».
په همدې منځ کې امریکایي چارواکو خبرداری ورکړی دی چې د لوړپوړو پوځي مشرانو ترمنځ د خبرو اترو د عادي کیدو سربیره د دواړو اړخونو ترمنځ فعاله خبرو اترو ته وده ورکول به یو څه وخت ته ضرورت ولري، چې له تایوان څخه نیولې بیا د چین سویلي سمندر او سوداګرۍ پورې د مختلفو مسائلو په اړه اختلافات موجود دي.
آژانسونه: ش.ن/ ن.ز