Leibniz-Gemeinschaft
16 Maj 2011
Shoqata Leibniz është një bashkim i 86 institucioneve, që merren me kërkime ose që vënë në dispozicion infrastrukturë shkencore. Organizata e sheh veten si partnere të shkollave të larta dhe të industrisë, politikës dhe institucioneve administrative. Në institutet Leibniz kryhen kërkime shkencore fundamentale me drejtim praktik në nivel ndërkombëtar. Përparësia e instituteve ka të bëjë me shumëllojshmërinë e temave të përpunuara dhe me pikënisjen ndërdisiplinore të punëve kërkimore.
Sektorët e veçantë shkencorë janë:
- shkencat shoqërore dhe kërkimet në fushën e arsimit
- shkencat ekonomike dhe sociale, shkencat e hapësirës
- shkencat e jetës
- shkencat matematike, natyrore dhe inxhinjerike
- shkencat e ambjentit
Synim i kërkimeve shkencore është zgjidhja e detyrave aktuale të së ardhmes në fushat e arsimit, kërkimit dhe teknologjisë. Shumë institute Leibniz kanë pasur si shkas për themelimin e tyre një problem konkret shoqëror.
Pjesë të shoqatës shkencore në këtë mënyrë janë institute të ndryshme si Instituti Bernhard - Nocht për mjekësinë tropikale në Hamburg, Instituti i Kërkimeve Shkencore në Halle ose Instituti i Gjuhës Gjermane në Manheim.
Autorin: Claudia Unseld/ Auron Dodi
Redaktion: Aida Cama